(روزنامہ قدس ۔آن لائن خبر رساں ادارہ ) لبنانی علماء کونسل کے سربراہ علامہ سید علی فضل اللہ نے کہا کہ لبنان میں فلسطینی پناہ گزینوں کے خلاف کسی قسم کی سازش کو قبول نہیں کیا جاسکتا۔
تفصیلات کے مطابق لبنانی علماء اور علمی شخصیات نے لبنان میں فلسطینی علماء کے دفتر کا دورہ کیا اس موقع پر فلسطینی علماء کونسل کے سربراہ الشیخ بسام کاید، حسین قاسم، علی یوسف اور خالد الزماری موجود تھے ، لبنانی علماء نے فلسطینی قوم کے حقوق کا تحفظ جاری رکھنے مظلوم فلسطینیوں کی دینی، انسانی اور اخلاقی حمایت جاری رکھنے کے عزم کا اعادہ کیا ہے۔
لبنانی علماء کونسل کے سربراہ علامہ سید علی فضل اللہ نے کہا کہ لبنان میں فلسطینی پناہ گزینوں کے خلاف کسی قسم کی سازش کو قبول نہیں کیا جاسکتا، اسرائیلی ریاست فلسطینی اور لبنانیوں کو آپس میں لڑانا اور دونوں قوموں کےدرمیان خلیج پیدا کرنے کی سازش کررہی ہے مگر فلسطینی اور لبنانی قوموں کو اپنی صفوں میں اتحاد اور یکجہتی کی فضاء پیدا کرنا ہوگی۔ان کا کہنا تھا کہ لبنان میں فلسطینی پناہ گزینوں کو لبنان میں بدامنی یا ملک کی سلامتی کے خلاف استعمال کرنےکی کسی کو اجازت نہیں دی جائے گی۔