اسرائیلی وزیراعظم بنجمن نیتن یاھو نے کہا ہے کہ وہ فلسطینی اتھارٹی کو ایک میٹر زمین بھی واپس نہیں کریں گے۔ ان کا کہنا ہے کہ جذبہ خیرسگالی کے تحت فلسطینی اتھارٹی کو مغربی کنارے کی اراضی کے کسی حصے کا کنٹرول دینے کی کوئی تجویز قبول نہیں کی جائے گی۔
رپورٹ کے مطابق اسرائیل کی حکمراں جماعت” لیکوڈ” کے اجلاس سے خطاب کرتے ہوئے نیتن یاھو کا کہنا تھا کہ وہ فلسطینیوں کو نہ تو 40 ہزار دونم اور نہ 10 ہزار دونم کا رقبہ دینے کو تیار ہیں۔ ہم تو فلسطینیوں کو ایک میٹر جگہ بھی نہیں دے سکتے۔نیتن یاھو کا کہنا تھا کہ ذرائع ابلاغ میں آنے والی وہ تمام اطلاعات قطعی بے بنیاد ہیں کہ اسرائیلی حکومت غرب اردن کی اراضی کا کچھ حصہ فلسطینی اتھارٹی کو دینے پر غور کررہی ہے۔ ایسا کوئی فیصلہ نہیں کیا گیا ہے۔ ہم فلسطینیوں کو ایک میٹر زمین بھی نہیں دے سکتے ہیں۔
خیال رہے کہ حال ہی میں ذرائع ابلاغ میں یہ خبر شائع ہوئی تھی کہ اسرائیلی حکومت مغربی کنارے اور بیت المقدس میں جاری کشیدگی کو کنٹرول کرنے کے لیے فلسطینی اتھارٹی کو کچھ مزید علاقوں کا کنٹرول دینے پر غورکررہی ہے۔