(روزنامہ قدس ۔آن لائن خبر رساں ادارہ) فلسطینی پناہ گزینوں کی مالی امداد بین الاقوامی معاہدوں کے تحت پوری عالمی برادری کی ذمہ داری ہے، عالمی برادری امداد کے وعدے پورے کرے۔
اقوام متحدہ کی ایجنسی برائے فلسطینی پنا ہ گزین ،ریلیف اینڈ ورکس ‘اونروا’ کے نومنتخب کمشنر جنرل کرسٹین سینڈرز نے عالمی برادری سے مطالبہ کیا ہے کہ وہ فلسطینی پناہ گزینوں کے لیے مالی امداد کے وعدوں پرعمل درآمد کو یقینی بنائے۔
انھوں نے کہا کہ ‘اونروا’ کے زیرانتظام فلسطینی پناہ گزینوں کی بہبود کے لیے جاری تعلیم، صحت، ریلیف، سماجی سروسز اور چھوٹے پیمانے پر روزگار کے لیے سرمایہ کاری کے منصوبوں کو آگے بڑھانے کے لیے بین الاقوامی برادری کی طرف سے بھرپور مالی مدد کی ضرورت ہے۔
یہ امداد بلا تعطل جاری رہنی چاہیے۔ انہوں نے مزید کہا کہ 30 سال سے قبل میں نے ‘اونروا’ میں غزہ کے علاقے میں اپنی خدمات انجام دینا شروع کیں۔ مجھے فخر ہے کہ آج مجھے اس ادارے کا سربراہ مقرر کیا گیا ہے۔خیال رہے کہ اونروا کے سبکدوش ہونے والے سربراہ پیر کرین پول نے بدھ کے روز اقوام متحدہ کے سیکرٹری جنرل انتونیو گوٹیرس کو اپنا استعفیٰ پیش کردیا تھا۔