غزہ میں بلا رکاوٹ امداد کی ترسیل یقینی بنائی جائے، یورپی یونین

(روزنامہ قدس ـ آنلائن خبر رساں ادارہ) یورپی یونین نے قابض اسرائیل کی حکومت سے مطالبہ کیا ہے کہ غزہ میں انسانی امداد کی بلا رکاوٹ ترسیل کو یقینی بنایا جائے۔

غاصب اسرائیل فلسطینی قوم کے ٹیکسوں سے حاصل شدہ وہ رقوم فوری طور پر جاری کرے جنہیں صہیونی حکومت نے غیرقانونی طور پر منجمد کر رکھا ہے۔ یہ رقوم، جنہیں فنڈز آف مقاصہ کہا جاتا ہے فلسطینی اتھارٹی کے مالی وسائل کا بنیادی حصہ ہیں جنہیں قابض اسرائیل ناجائز طور پر روکے بیٹھا ہے۔

یورپی یونین کے رہنمائوں نے برسلز میں ہونے والی اپنی سربراہی کانفرنس کے اختتامی بیان میں قابض اسرائیل سے مطالبہ کیا کہ وہ نہ صرف مقاصہ فنڈز جاری کرے بلکہ مقبوضہ مغربی کنارے اور القدس میں جاری کشیدگی کم کرے، غیرقانونی سفاکانہ صہیونی توسیع پسندی (بستیوں کے قیام)کو فورا بند کرے اور ان علاقوں میں اپنی قاتلانہ فوجی کارروائیاں فلفور ختم کرے جنہوں نے فلسطینی عوام کی زندگی اجیرن بنا دی ہے۔

بیان میں رہنمائوں نے غزہ میں فائر بندی کے معاہدے تک پہنچنے میں کردار ادا کرنے والے تمام فریقوں کی کوششوں کو سراہا۔

یورپی یونین نے زور دیا کہ غزہ کی پٹی میں انسانی امداد کی فوری اور بلا رکاوٹ ترسیل کو یقینی بنایا جائے تاکہ وہاں قابض اسرائیل کی مسلط کردہ بھوک، بیماری اور قحط کی سنگین صورتحال میں پھنسے فلسطینی عوام کو ریلیف فراہم کیا جا سکے۔

بیان کے آخر کہا گیا کہ اقوام متحدہ، اس کی ذیلی ایجنسیوں اور بین الاقوامی انسانی تنظیموں کو آزادانہ اور غیرجانبدارانہ طور پر کام کرنے کی اجازت دی جائے۔