فلسطین کے مقبوضہ مغربی کنارے کے شمالی شہر طولکرم میں جمعہ کے روز نماز جمعہ کے بعد اسرائیلی ریاستی دہشت گردی اور مسجد اقصیٰ کی حمایت میں نکالی گئی ایک احتجاجی ریلی پر فلسطینی اتھارٹی کے سیکیورٹی اہلکاروں نے حملہ کردیا جس کے نتیجے میں کئی مظاہرین زخمی ہوگئے۔
ذرائع کے مطابق مغربی کنارے کے طولکرم شہر میں اسلامی تحریک مزاحمت "حماس” کی اپیل پر مسجد اقصیٰ کے دفاع میں ریلی کا انعقاد کیا گیا تھا۔ نماز جمعہ کے اجتماعات کے بعد مختلف مساجد سے بڑی تعداد میں شہری وسطی طولکرم میں جمع ہوئے جہاں انہوں نے ایک ریلی کی شکل اختیار کرلی۔ اس موقع پر فلسطینی پولیس نے مظاہرین پر آنسوگیس کی شیلنگ کی اور ان پر وحشیانہ لاٹھی چارج کیا جس کے نتیجے میں درجنوں افراد زخمی ہوئے ہیں۔عینی شاہدین نے ذرائع کوبتایا کہ نماز جمعہ کے بعد جامع مسجد عثما بن عفان سے شہریوں کی بڑی تعداد فلسطینی پرچم لہراتےہوئے سڑکوں پر نکلے اور ایک ریلی کی شکل اختیار کرلی۔ کئی دوسری مساجد سے بھی فلسطینی اس ریلی میں شریک ہوئے۔ عباس ملیشیا نے مظاہرین کو منتشر کرنے کے لیے ان پرحملہ کیا اور تشدد کے ساتھ ساتھ 20 مظاہرین کو حراست میں لے لیا گیا ہے۔ عباس ملیشیا کے اہلکاروں نے ریلی پر تشدد کے دوران مظاہرین سے ان کے موبائل فون بھی چھین لیے۔
فلسطینی رکن پارلیمنٹ فتحی القرعاوی نے "مرکز” کو بتایا کہ عباس ملیشیا نے نہتے مظاہرین پر وحشیانہ تشدد کرکے اسرائیلی فوج کے مظالم کی یاد تاز کردی ہے۔ انہوں نے کہا کہ مظاہرین کو منتشر کرنے کے طاقت کا اس قدر وحشیانہ استعمال کسی صورت میں قابل قبول نہیں ہے۔ عباس ملیشیا نے یہ ثابت کیا ہے کہ اسرائیلی فوج کی عدم موجودگی میں وہ اس سے بڑھ کر سفاکیت کا مظاہرہ کررہی ہے۔