مرکز اطلاعات فلسطین کے مطابق نیتن یاھو کی جانب سے یہ اعلان آئی سی سی کی پراسیکیوٹر جنرل فاٹو بنسودڈا کے اس بیان کے رد عمل میں کیا گیا ہے جس میں انہوں نے فلسطین میں اسرائیل کے جنگی جرائم کی تحقیقات شروع کرنے کا فیصلہ کیا ہے۔
اسرائیلی اخبار ’’ہارٹز‘‘ کی رپورٹ کے مطابق نیتن یاھو نے کابینہ کے اجلاس سے خطاب کرتے ہوئے کہا کہ ہمیں بین الاقوامی فوج داری عدالت کی طرف سے جنگی جرائم کی تحقیقات کے اعلان کے رد عمل میں فوری اور موثر اقدامات کرنا ہوں گے۔ اس مقصد کے لیے عالمی ابلاغی مہم چلانے کی ضرورت ہے تاکہ آئی سی سی کے وجود کو آئینی طور پر متنازعہ بنا کر جنگی جرائم کی تحقیقات کو غیرموثر بنایا جا سکے۔
رپورٹ کے مطابق نیتن یاھو نے وزارت خارجہ اور وزارت اطلاعات و نشریات کو ہدایت کی کہ وہ اندرون اور بیرون ملک ابلاغی اور سفارتی مہم شروع کریں جس کے ذریعے عالمی فوج داری عدالت اس کی خاتون پراسیکیوٹر جنرل بنسوڈا کو متنازعہ بنایا جاسکے۔
نیتن یاھو نے آئی سی سی کی پراسیکیوٹر جنرل بنسوڈا کو صہیونی ریاست کی ’دشمن‘ قرار دیتے ہوئے کہا کہ مسز بنسوڈا اسرائیل سے اپنے دفاع کا حق بھی سلب کرنا چاہتی ہیں۔ ان کی خواہش ہے کہ وہ اسرائیل کو دہشت گردی کے سامنے ہاتھ باندھ کر کھڑا رکھنے پر مجبور کریں۔
اسرائیلی اخبار کے مطابق کابینہ کے اجلاس میں وزیر دفاع موشے یعلون، وزیرداخلہ، وزیرانصاف اور سیکیورٹی سے متعلق شعبے کے اہم عہدیدار بھی موجود تھے۔
بشکریہ:مرکزاطلاعات فلسطین