فلسطین کے مقبوضہ مغربی کنارے کے شمالی شہر جنین میں سہل مرج بن عامر اور تعنک قصبوں میں اسرائیلی فوجیوں نے پانی کا ایک کنواں مسمار کرنے کے ساتھ ساتھ مقامی فلسطینی شہریوں کی زرعی املاک کی بھی توڑپھوڑ کی ہے۔
رپورٹ کے مطابق منگل کے روز اسرائیلی فوجیوں نے بلڈوزر کی مدد سے جنین میں پانی کا ایک مرکزی کنواں مسمار کردیا جس کے نتیجے میں مقامی فلسطینی آبادی زراعت اور آب پاشی کے لیے پانی سے محروم ہوگئی ہے۔ قابض فوجیوں نے مرج بن عامر کالونی میں فلسطینیوں کی زرعی املاک کی بھی توڑپھوڑ کی اور متعدد املاک مسمار کیں۔تعنک قصبے کے مقامی فلسطینی میئر طلال حسین نے بتایا کہ اسرائیلی فوجیوں نے منگل کے روز اسماعیل جرادات، سلیمان زیود اور نعمان جرادات کی اراضی کو سیراب کرنے کے لیے استعمال ہونے والے پانی کے کوئیں میں ملبہ ڈال کر اسے تباہ کردیا۔
طلال حسین نے بتایا کہ کنوئیں کی مسماری بغیر کسی پیشگی اطلاع یا قبل ازوقت نوٹس کے عمل میں لائی گئی ہے۔ صہیوی فوجیوں نے کنوئیں کی مسماری کی وجہ بھی بیان نہیں کی ہے۔