ترکی کے صدر رجب طیب ایردوآن نے کہا ہے کہ فلسطینی عوام دفاع قبلہ اول تمام مقدسات کی حفاظت کے لیے باعزت جدو جہد کررہے ہیں۔ان کا کہنا ہے کہ فلسطینیوں کی حمایت پوری مسلم امہ اور زندہ ضمیر اقوام کی بنیادی ذمہ داری ہے۔
رپورٹ کے مطابق انقرہ میں اسلامی تعاون تنظیم کے وزراء اقتصادیات کے ایک اجلاس سے خطاب کرتے ہوئے ترک صدر کا کہنا تھا کہ غزہ کی پٹی کا اسرائیل کی جانب سے جاری محاصرہ عالمی قوانین کی سنگین خلاف ورزی ہے۔ اسرائیل نے غزہ کی پٹی کو ایک کھلی جیل میں تبدیل کردیا ہے۔ غزہ کی ناکہ بندی کے باعث دو ملین لوگوں کی زندگیاں اجیرن ہو کر رہ گئی ہیں۔ اب وقت آگیا ہے کہ غزہ کی پٹی پرعائد اسرائیلی پابندیاں فوری ختم کی جائیں۔خیال رہے کہ فلسطین میں یکم اکتوبر سے جاری تحریک انتفاضہ کے دوران اسرائیلی فوج نے نہتے فلسطینیوں پر وحشیانہ مظالم کے دوران کم سے کم 97 فلسطینیوں کو شہید کردیا ہے۔ دوسری جانب غزہ کی پٹی پر سنہ 2007 ء سے اسرائیلی پابندیاں مسلط ہیں۔ غزہ کی پٹی کی واحد بین الاقوامی گذرگاہ رفح کو مصری فوج نےبند کر رکھا ہے۔ غزہ کی یہ واحد بین الاقوامی گذرگاہ پچھلے تین ماہ سے مسلسل بند چلی آ رہی ہے جس کے نتیجے میں غزہ کے عوام کو سنگین مشکلات کا سامنا کرنا پڑا ہے۔