اسرائیل کے دارالحکومت "تل ابیب”[ تل الربیع] میں قائم کریات جات نامی یہودی کالونی میں ہفتے کی شام نامعلوم افراد نے چاقو سے حملے میں کم سے کم چار یہودی آباد کاروں کو زخمی کردیا ہے۔
رپورٹ کے مطابق یہودی کالونی کریات جات کی شاہراہ داؤد پر ہفتے کی شام عراق منشیہ قصبے میں نامعلوم افراد نے چاقو سے حملے میں چار یہودی زخمی کیے۔ حملہ آور کارروائی کے بعد بہ حفاظت فرار رہوگئے۔ایک مقامی ذریعے کا کہنا ہے کہ شاہراہ داؤد پر فائرنگ کی آوازیں بھی سنی گئی ہیں تاہم یہ معلوم نہیں ہوسکا کہ آیا وہ فائرنگ کس نے کی تھی۔ چاقو سے حملہ کرنے والے افراد کی شناخت نہیں کی جاسکی ہے۔
اسرائیلی پولیس کی خاتون ترجمان لوبا سمری نے بتایا کہ ایک مشتبہ فلسطینی نے کریات جات کالونی میں گھس کر چار یہودی آبادکاروں کو چاقو سے نشانہ بنایا جس کے نتیجے میں وہ زخمی ہوگئے۔ پولیس نے جائے وقوعہ پر پہنچ کر حملہ آوروں کو تلاش کرنے کی کوشش کی مگر کسی شخص کو حراست میں نہیں لیا جاسکا ہے۔
ترجمان نے بتایا کہ چاقو کے حملے میں زخمی ہونے والے یہودی آباد کاروں کو اسپتال منتقل کیا گیا جہاں ان میں سے بعض کی حالت تشویشناک بیان کی جاتی ہے۔