اقوام متحدہ کے سیکرٹری جنرل بان کی مون دو روزہ دورے پر آج منگل کو اسرائیل پہنچ رہے ہیں جہاں وہ فلسطینی اتھارٹی کی قیادت سے بھی ملاقات کریں گے۔ اقوام متحدہ کے ذرائع کے مطابق بان کی مون کے دورہ کا مقصد فلسطین اور اسرائیل کے درمیان جاری تازہ کشیدگی کو کم کرنا ہے۔
رپورٹ کے مطابق اقوام متحدہ کے ایک عہدیدار نے نام ظاہر نہ کرنے کی شرط پر فرانسیسی خبر رساں ادارے سے بات کرتے ہوئے کہا کہ بان کی مون اچانک آج منگل کو تل ابیب پہنچ رہے ہیں۔ وہ فلسطین اور اسرائیل میں دو دن گذاریں گے۔ اس دوران ان کی ملاقات فلسطینی اتھارٹی کی قیادت سے بھی ہوگی۔تاہم ان کے دورے کی دیگر تفصیلات سامنے نہیں آسکی ہیں۔
اسی ہفتے امریکی وزیرخارجہ جان کیری بھی اسرائیلی وزیراعظم بنجمن نیتن یاھو اور فلسطینی اتھارٹی کے سربراہ محمود عباس سے ملاقات کریں گے۔
قبل ازیں اقوام متحدہ کے سیکرٹری جنرل کی جانب سے فلسطینیوں اور اسرائیل کے نام جاری ایک پیغام میں انہیں تشدد کا راستہ ترک کرنے پر زور دیا تھا۔ یو این سیکرٹری جنرل نے فلسطینی اتھارٹی اور اسرائیلی حکومت سے مذاکرات بحال کرنے اور تشدد کا سلسلہ بندکرنے کا مطالبہ کیا۔