(روزنامہ قدس ۔آن لائن خبر رساں ادارہ) آزاد کشمیر کے صدر سردار مسعود خان نے کہاہے کہ پاکستان اور بھارت کے درمیان جنگ کے خدشات بہت زیادہ ہیں۔
ذرائع کے مطابق گزشتہ روز لاہور میں ایک ریسرچ سینٹر کے زیر اہتمام کشمیریوں پر جبر کے موضوع پر ویڈیو لنک سیمینار کا اہتمام کیا گیاجس میں شریک صدر آزاد کشمیر سردار مسعود خان، حریت رہنما یاسین ملک کی اہلیہ مشعال ملک اور پیپلز پارٹی کی رہنماء شیری رحمان سمیت دیگر نے پاکستان اور بھارت کے درمیان بڑھتی ہوئی کشیدگی کی اصل وجہ مسئلہ کشمیر پر بات کر تے ہوئےکشمیر میں بھارتی جارحیت کی نشاندہی کی جس میں بھارت کی جانب سےصرف 2020 میں اب تک پرتشدد کارروائیوں میں 1400 سے زائد کشمیری زخمی ہوئےتاہم فورسز کے ہاتھوں 968 مکانات بھی مسمار ہوئے جبکہ مقبوضہ وادی میں 89 خواتین کے ساتھ عصمت دری کے واقعات پیش آئے۔
صدر آزاد کشمیر سردار مسعود خان نے بھی سیمینار سے خطاب کرتے ہوئے کہا کہ دنیا میں کہیں ایٹمی جنگ ہونی ہے تو وہ جنوبی ایشیا کے خطے میں ہوگی۔
انہوں نے بھارتی جارحانہ رویے کے حوالے سے زور دیکر کہا کہ پاکستان اور بھارت کے درمیان جنگ کے خدشات بہت زیادہ ہیں ہمیں ہندوتوا کی بھرپور مخالفت کرنا ہوگی تاہم دنیا کے لیے کشمیر نیوکلئیر فلیش پوائنٹ بن چکا ہے۔