تیونس میں ہفتے کے روز ہزاروں افراد نے فلسطین میں جاری اسرائیلی فوج کی ریاستی دہشت گردی اور مسجد اقصیٰ کی بے حرمتی کے خلاف احتجاجی جلوس نکالا۔ مظاہرے میں خواتین اور بچوں سمیت ہرطبقہ زندگی سے تعلق رکھنے والے ہزاروں شہریوں نے شرکت کی۔
رپورٹ کےمطابق فلسطین میں جاری تحریک انتفاضہ القدس کی حمایت اور اسرائیلی فوج کی ریاستی دہشت گردی کے خلاف احتجاجی مظاہرے کی اپیل ملک کی سب سے بڑی منظم اسلام پسند مذہبی سیاسی جماعت تحریک النہضہ کی جانب کی گئی تھی۔مقامی میڈٰیا کے مطابق دارالحکومت تیونسیہ مین شاہراہ الحبیب بور قیبہ میں ہزاروں افراد نے فلسطینیوں کے ساتھ اظہار یکجہتی کے لیے جلوس نکالا۔ مظاہرین نے ہاتھوں میں فلسطینی پرچم، فلسطینی رہ نماء الشیخ احمد یاسین اور دوسرے رہ نماؤں کی تصاویر اٹھا رکھی تھیں۔ مظاہرین نے فلسطین میں انتہا پسند یہودیوں اور اسرائیلی فوج کے ہاتھوں نہتے فلسطینیوں پر ڈھائے جانے والے مظالم کی شدید مذمت کی۔
مظاہرین نے فلسطین کی آزادی کے حق اور اسرائیل کے ناجائز قبضے کے خلاف بھی شدید نعرے بازی ی۔ احتجاجی مظاہرے سے خطاب کرتے ہوئے مقامی رہ نماؤں نے تحریک انتفاضہ القدس پر روشنی ڈالی اور کہا کہ تیونس کے عوام فلسطینیوں کے خلاف جاری اسرائیلی ریاستی دہشت گردی کےخلاف تیونسی عوام فلسطینیوں کی حمایت جاری رکھیں گے۔