(فلسطین نیوز۔مرکز اطلاعات) اسرائیلی جیلوں میں 83 دن سے مسلسل بھوک ہڑتال کرنے والے فلسطینی صحافی اور سعودی عرب کے المجد ٹی وی کے نامہ نگار محمد اسامہ القیق کے ساتھ اظہار یکجہتی کے لیےایران میں بھی صحافتی برادری نے احتجاجی مظاہرے کئے ہیں۔
رپورٹ کے مطابق اتوار کو تہران میں مقامی صحافتی تنظیموں کی جانب سے ایک بڑا احتجاجی جلوس نکالا گیا۔ مظاہرین نے ہاتھوں میں القیق کی تصاویر اور اس کی رہائی کے مطالبات پر مبنی پوسٹرز اٹھا رکھے تھے۔ مظاہرین نے القیق کی رہائی کے لیے شدید نعرے بازی کی اور ساتھ ہی صہیونی ریاست کے جرائم کو بے نقاب کرنے اور صہیونی مجرموں کو کیفر کردار تک پہنچانے کے لیے ان کے خلاف عالمی فوجداری عدالتوں میں مقدمات قائم کرنے کا مطالبہ کیا ۔ایرانی صحافتی حلقوں کی جانب سے جاری کردہ بیانات میں محمد القیق کے ساتھ مکمل اظہار یکجہتی کرتےہوئے مسلسل 83 دن سےبھوک ہڑتال جاری رکھنے پر اسے شاندار خراج تحسین پیش کیا۔ بیانات میں کہا گیا ہے کہ صہیونی ریاست کی جانب سے نہتے شہریوں کو انتظامی قید میں ڈالنا اور انہیں بھوک ہڑتال پرمجبور کرنا سنگین جنگی جرائم ہیں اور بین الاقوامی انسانی حقوق کی سنگین پامالیاں ہیں۔ عالمی برادری کو القیق کی بھوک ہڑتال ختم کرانےاور اس کے جائز مطالبات منوانے کے لیے تل ابیب پر دباؤ ڈالنا چاہیے۔