انقرہ (روز نامہ قدس ۔آن لائن خبر رساں ادارہ) ترکی کے وزیرخارجہ مولود چاوش اوگلو نے کہا ہے کہ مقبوضہ بیت المقدس کے قانونی اور تاریخی اسٹیٹس کا تحفظ پہلی ترجیح ہے اور دنیا بھرکے اداروں میں القدس کا بھرپور دفاع کریں گے۔
روز نامہ قدس کو موصول ہونے والی اطلاعات کے مطابق یورپی ممالک میں متعین فلسطینی سفیروں کے استنبول میں منعقدہ مشاورتی اجلاس سے خطاب میں انہوں نے کہا کہ بیت المقدس کا آئینی، قانونی، تاریخی، تہذیبی اور اسلامی تشخص ہماری پہلی ترجیح اور ترکی کی خارجہ پالیسی کا اہم عنصر ہے۔ ہمارے لیے القدس کا مسئلہ انتہائی مقدس ہے اور اس کے ساتھ اپنا تعلق مزید مضبوط کریں گے۔ القدس کو لاحق خطرات کے تدارک کے لیے عالمی سطح پر بھرپور اقدامات کیے جائیں گے۔
ترک وزیرخارجہ کاکہنا تھا کہ القدس کے دفاع اور تحفظ کے لیے بین الاقوامی سطح پرکوششیں جاری رکھیں گے اور فلسطینیوں اور القدس کے خلاف اسرائیلی ریاست کے مظالم کو عالمی سطح پر بے نقاب کریںگے۔
ترک وزیرخارجہ کا کہنا تھا کہ اسرائیل نے ماضی کی غلطیوں سے سبق نہیں سیکھا بلکہ ماضی کے غلط اقدامات اور روش پربدستور قائم ہے۔
چاووش اوگلو کا کہنا تھا کہ اسرائیل غزہ کی پٹی کے عوام کے خلاف انتقامی حربے استعمال کررہاہے اور غزہ کے دو ملین لوگوں کی زندگی اجیرن بنانے کے ساتھ ساتھ تنازع فلسطین کے دو ریاستی حل کی راہ میں بھی رکاوٹیں کھڑی کررہا ہے۔