(روزنامہ قدس ۔آن لائن خبر رساں ادارہ) برمنگھم تحریک کشمیر یورپ کے صدر محمد غالب نے کہا ہے کہ کشمیر ایک وحدت ہےاوراقوام متحدہ کی قراردادوں کے مطابق مسئلہ کشمیر متنازع اور حل طلب مسئلہ ہے۔
وزیر اعظم پاکستان نے اقوم متحدہ کی جنرل اسمبلی سے خطاب کرتے ہوئے عالمی برادی اقوام متحدہ سے ایک بار پھر مطالبہ کیا ہےکہ کشمیر میں بھارت کی جانب سے ہونے والی ظلم و بربریت کے خلاف بھارتی درندگی کو روکا جائے۔
ذرائع کے مطابق گزشتہ روز برمنگھم تحریک کشمیر یورپ کے صدر محمد غالب نے کہا ہےکہ حکومت موجودہ حالات میں بھارتی سازشوں پر توجہ دے تاکہ مقبوضہ کشمیر میں مودی کی غیر کشمیریوں کو آباد کر کے آبادی تناسب کو تبدیل کر کے نتائج کو اپنے حق میں حاصل کرنے کی سازشوں کو ناکام بناتے ہوئے اس کو روکنے کے لیے عملی اقدامات کیے جائیں اور کشمیر کو تقسیم کرنے سے بچایا جائے۔
محمدغالب نےکہا کہ حکومت پاکستان ایسے اقدامات سے گریز کرے جس سے مسئلہ کشمیر اور کشمیریوں کی جدو جہدکو نقصان پہنچے اور کشمیریوں کے اندر پاکستان کے بارے میں بے اعتمادی اور غلط فہمیاں پیدا ہوں کیوں کہ پاکستان دنیا کاواحد ملک ہے جس سے کشمیریوں کی بڑی توقعات ہیں جبکہ یہ بھی ایک اٹل حقیقت ہے کہ پاکستان کی حمایت اور عملی مدد کے بغیر کشمیر آزاد نہیں ہوسکتا۔
ان کا کہنا تھا کہ نو لاکھ بھارتی فوج کو پتھروں سے نہیں نکالا جاسکتا تاہم حکومت کشمیری عوام کی خواہشات کے مطابق کشمیر پالیسی اور حکمت عملی اپنائے۔
انہوں نے کہا کہ حکومت کے وفاقی وزرا ءحکومت کی پالیسوں پر عدم اعتماد کا اظہار کررہے ہیں اور وزارت خارجہ کی کارکردگی پر سوال اٹھائے جارے ہیں اس صورت حال میں حکومت اپنی پالیسیوں پر نظر ثانی کرےتاکہ مختلف محاذوں پر برسرپیکار کشمیریوں کو اعتماد میں لے کر فیصلے کرے۔