اقوام متحدہ: قابض اسرائیل کا ای ون بستی منصوبہ ناقابل قبول ہے

(روزنامہ قدس ـ آنلائن خبر رساں ادارہ) اقوام متحدہ نے قابض اسرائیل کی جانب سے مقبوضہ فلسطینی سرزمین پر جاری استعماری بستیوں کی سرگرمیوں کو ایک بار پھر دوٹوک انداز میں مسترد کرتے ہوئے کہا ہے کہ یہ سرگرمیاں بین الاقوامی قانون کے مطابق قطعی طور پر غیر قانونی ہیں۔

اقوام متحدہ کے ترجمان اسٹیفان ڈوجاریک نے ایک پریس بریفنگ کے دوران کہا کہ قابض اسرائیل کا ای ون صہیونی بستی منصوبے کو وسعت دینے کا فیصلہ کسی طور بھی قبول نہیں۔

انہوں نے وضاحت کی کہ بستیوں کی توسیع اس حقیقت کو سنگین حد تک نقصان پہنچاتی ہے کہ مستقبل میں دو ریاستی حل ممکن ہو سکے۔

ڈوجارک نے زور دیا کہ ہم سفاک صہیونی حکومت سے مطالبہ کرتے ہیں کہ تمام استعماری سرگرمیاں فوری طور پر بند کی جائیں اور قابض اسرائیل بین الاقوامی قانون کے تحت اپنی ذمہ داریوں پر پوری طرح عمل کرے۔

ای ون منصوبہ مقبوضہ مشرقی بیت المقدس کے مشرق میں تقریباً بارہ مربع کلومیٹر رقبے پر پھیلا ہوا ایک بڑا استعماری منصوبہ ہے جو معالیہ ادومیم نامی غیر قانونی بستی کو بیت المقدس شہر سے جوڑنے کے لیے بنایا جا رہا ہے۔

اس منصوبے کا مقصد بیت المقدس کے مشرقی حصے کو اس کے فلسطینی ماحول سے کاٹ دینا اور شمالی و جنوبی مغربی کنارے کے درمیان زمینی ربط کو ختم کرنا ہے۔

ای ایک منصوبے کے تحت تین ہزار چار سو سے زائد استعماری رہائشی یونٹس، بنیادی ڈھانچے اور دیگر سہولیات تعمیر کی جائیں گی جس سے ایک جغرافیائی طور پر مربوط اور آزاد فلسطینی ریاست کا قیام تقریباً ناممکن ہو جائے گا۔

یہ منصوبہ پہلی بار نوے کی دہائی میں سامنے آیا تھا تاہم عالمی دباؤ کے باعث اسے منجمد کر دیا گیا تھا مگر حالیہ عرصے میں قابض اسرائیل نے دوبارہ اسے زندہ کر دیا جس پر اقوام متحدہ، یورپی یونین اور کئی ممالک کی جانب سے شدید مذمت کی گئی۔ ان عالمی حلقوں نے اسے بین الاقوامی قانون کی صریح ًخلاف ورزی اور دو ریاستی حل کے لیے کاری ضرب قرار دیا۔