عمان (روز نامہ قدس ۔آن لائن خبر رساں ادارہ) اردن کی ایک خاتون وزیرہ کی جانب سے اسرائیلی پرچم پاؤں تلے روندے جانے پر صیہونی ریاست نے عمان کے خلاف سخت غم وغصے کا اظہار کیا ہے۔
روز نامہ قدس کو موصول ہونے والی اطلاعات کے مطابق اسرائیلی حکومت نے ایک بیان میں کہا ہے کہ اردنی وزیرہ جمانہ غنیمات نے دانستہ طورپر اسرائیلی پرچم کی توہین کی ہے۔ سوشل میڈیا پرایک تصویر وائرل ہوئی ہے جس میں جمانہ غنیمات کو ایک یونین کے دفتر میں داخل ہوتے ہوئے اسرائیلی پرچم کو پاؤں تلے روندتے دیکھا جاسکتا ہے۔
عبرانی اخبار ’’یدیعوت احرونوت‘‘ کےمطابق وزیرہ جمانہ غنیمات نے دانستہ طورپر اسرائیلی پرچم کی توہین کی ہے۔ رپورٹ کے مطابق اسرائیلی پرچم کی ایک وزیر کے ہاتھوں توہین اردنی وزیراعظم عمر الرزاز کی حکومت کے لیے سوالیہ نشان ہے۔
اردنی وزیرہ کے ہاتھوں اسرائیلی پرچم کی توہین کی تصاویر سوشل میڈیا پر بڑے پیمانے پر مشتہر کی جا رہی ہیں۔ اسرائیلی صحافتی اور سیاسی حلقوں کی طرف سےاس پر شدید رد عمل سامنے آیاہے۔
ادھر اردن میں سوشل میڈیا پرجمانہ غنیمات کی حمایت میں مسلسل اضافہ کیا جا رہا ہے۔ اردنی اور فلسطینی شہریوں نے اسرائیلی پرچم کو روندے جانے کے تصاویر کو بڑے پیمانے پر شیئر کیا جا رہا ہے۔