اسرائیلی پولیس اور فوج نے فلسطینی شہریوں کے خلاف کریک ڈاؤن کا دائرہ مقبوضہ مغربی کنارے اور بیت المقدس سے آگے بڑھاتے ہوئے جنوبی اور شمالی فلسطینی شہروں تک پہنچا دیا ہے۔ اطلاعات کے مطابق گذشتہ روز فلسطین کے سنہ 1948 ء کے علاقے ام الفحم سے اسرائیلی پولیس نے 12 فلسطینی شہریوں کو گرفتار کرلیا۔
انسانی حقوق کے مندوبین نے بتایا کہ فلسطینی شہریوں کی گرفتاریاں اس وقت عمل میں آئیں جب ام الفحم کے مقام پر فلسطینی شہریوں نے اسرائیلی ریاستی دہشت گردی کے خلاف احتجاج کا سلسلہ شروع کر رکھا تھا۔ مظاہرین کو منتشر کرنے کے لیے اسرائیلی پولیس نے طاقت کا استعمال کیا جس کے نتیجے میں متعدد فلسطینی زخمی بھی ہوئے ہیں۔
عینی شاہدین نے بتایا کہ مظاہرین نے ہاتھوں میں فلسطینی پرچم اٹھا رکھے تھے اور وہ اسرائیل اور صہیونی فوج، پولیس سمیت یہودی آباد کاروں کے خلاف شدید نعرے بازی کررہے تھے۔