فلسطین کے مقبوضہ مغربی کنارے کے شہرالخلیل میں سوموار کے روز اسرائیلی فوجیوں نے فائرنگ کرکے ایک اور فلسطینی نوجوان کو شہید کردیا۔ اسرائیلی فوج کا کہنا ہے کہ فلسطینی نوجوان کو اس وقت گولیاں ماری گئیں جب اس نے ایک فوجی اہلکار پر چاقو سے حملہ کیا۔
عینی شاہدین نے بتایا کہ اسرائیلی فوجیوں نے الخلیل کے شمال میں بیت عینونی کے مقام پر گرلز اسکول کے سامنے سے گذرتے ہوئے ایک فلسطینی نوجوان کو گولیاں ماریں۔ فلسطینی نوجوان کے جسم میں نو گولیاں لگیں جس کے نتیجے میں وہ شدید زخمی ہوا اور بعد ازاں موقع پر ہی دم توڑ گیا۔ایک دوسرے ذریعے کا کہنا ہے کہ فلسطینی نوجوان کو ایمبولینس کی مدد سے اسپتال منتقل کیا گیا تھا تاہم ایک دوسرے ذریعے کا کہنا ہے کہ اسرائیلی فوجیوں نے ایمبولینس زخمی فلسطینی تک پہنچنے نہیں دی جس کے نتیجے میں وہ دم توڑ گیا۔