واشنگٹن (روز نامہ قدس ۔آن لائن خبر رساں ادارہ) امریکی سینٹ میں اسرائیل کا بائیکاٹ کرنے والی عالمی تحریک اور اس کے ساتھ وابستہ عالمی کارکنوں کو سزا دینے کے لیے ایک نیا بل منظور کیا گیا ہے۔ اس بل کی منظوری کے بعد امریکا میں اسرائیلی ریاست کے بائیکاٹ کے لیے کام کرنے والے اداروں، تنظیموں اور شخصیات کے خلاف قانونی کارروائی عمل میں لائی جاسکے گی۔
روز نامہ قدس کو موصول ہونے والی اطلاعات کے مطابق کانگریس میں ایک دوسرے بل میں بھی ترمیم کی گئی جس میں کہا گیا ہے کہ شام سے اچانک امریکی فوج کی واپسی کا اعلان نہیں کیا جا سکتا۔
اسرائیلی بائیکاٹ تحریک کے کارکنوں کے خلاف کارروائی کے لیے پیش کردہ بل پر رائے شماری کےدوران 77 ارکان نے حمایت جبکہ 23 نے مخالفت کی۔
تاہم اس بل پرعمل درآمد کے لیےایوان نمائندگان کی طرف سے بھی منظوری بھی ضروری ہے۔ ایوان نمائندگان میں ڈیموکریٹس کی اکثریت ہے۔ فلسطینیوں کے حوالے سے ایوان نمائندگان میں بھی کسی بڑے بریک تھرو کی امید نہیں کیونکہ امریکی حکومت پہلے ہی فلسطینیوں کے خلاف کافی پابندیاں عائد کرچکی ہے ۔