فلسطین کے ممتاز عالم دین اور سپریم اسلامی کونسل کے چیئرمین الشیخ ڈاکٹر عکرمہ صبری نے یہودی مذہبی پیشوائوں کی جانب سے فلسطینی مزاحمت کاروں کو واجب القتل قرار دینے کے فتوئوں کی مذمت کرتے ہوئےان فتاویٰ کو بدترین اور بے رحم صہیونی نسل پرستی کا مظہر قرار دیا ہے۔
رپورٹ کے مطابق الشیخ عکرمہ صبری نے اپنے ایک بیان میں کہا ہے کہ فلسطین میں اس وقت نہتے شہریوں کے قتل عام اور ان کی املاک کی تباہی کی لگائی گئی آگ میں یہودی مذہبی پیشوا ملوث ہیں جو انتہا پسند یہودیوں کو فلسطینیوں کے قتل عام اور ان کی املاک تباہ کرنے پر اکسا رہےہیں۔خیال رہے کہ اسرائیلی اخبارات نے یہودی مذہبی پیشوائوں کا ایک نیا فتویٰ شائع کیا ہے جس میں کہا گیا ہے کہ فلسطینی مزاحمت کاروں کا قتل مذہبی ذمہ داری ہے۔ کسی بھی فلسطینی مزاحمت کار کو زندہ چھوڑنے کا کسی کو حق نہیں ہے۔ تمام فلسطینی مزاحمت کار واجب القتل ہیں۔
الشیخ عکرمہ صبری نے اسرائیلی فوج کی جانب سے بیت المقدس میں کرفیو نافذ کرنے کو نہتے فلسطینیوں کو اجتماعی سزا دینے کے مترادف قرار دیا۔ انہوں نے کہا کہ صہیونی فوج کی جانب سے بیت المقدس کی تجارتی اور کاروباری سرگرمیوں پرپابندی عاید کرنا اور نظام زندگی مفلوج کرنا ہزاروں فلسطینیوں کو اجتماعی سزا دینے کے مترادف ہے۔
الشیخ صبری کا کہنا تھا کہ صہیونی فوج نےعملا بیت المقدس کو مغربی اور مشرقی حصے میں تقسیم کر کے رکھ دیا ہے۔ بیت المقدس میں داخل ہونے والے یہ محسوس کررہے ہیں کہ وہ کسی فوجی کیمپ میں داخل ہوگئے ہیں ۔ صہیونی ریاست اور فوج کی جانب سے بیت المقدس میں نظام زندگی مفلوج کرکے یہ ثابت کرنے کی کوشش کی گئی ہے کہ القدس صہیونی ریاست کا حصہ ہے۔