اسرائیلی فوج نے فلسطین کے مقبوضہ مغربی کنارے کے جنوبی شہر بیت لحم میں "غوش عتصیون” نامی یہودی کالونی کے قریب ایک فلسطینی نوجوان کو گولیاں مار کر شہید کردیا۔
رپورٹ میں بتایا ہے کہ اسرائیلی فوجیوں نے جمعرات کی شام ایک فلسطینی نوجوان کو اس وقت فائرنگ کا نشانہ بنایا جب اس نے ایک فوجی اہلکار پر چاقو سے حملے کی کوشش کی۔دوسری جانب فلسطینی وزارت داخلہ کی جانب سے جاری کردہ بیان میں کہا گیا ہے کہ اسرائیلی فوجیوں نے ایک فلسطینی نوجوان مالک طلال الشریف کو جنوبی بیت لحم میں غوش عتصیون کے مقام پر گولیاں مارکر شہید کردیا۔
اسرائیل کے ذرائع ابلاغ نے فلسطینی نوجوان کی شہادت کا جواز پیش کرنے کے لیے اس پر چاقو سے حملے کی کوشش کا الزام عاید کیا ہے۔ ویب سائیٹس پر بھی ایک فلسطینی نوجوان کی شہادت کی تصدیق کی گئی ہے اور کہا ہے کہ فلسطینی شہری کی شہادت کے بعد پولیس کے علاقے کوگھیرے میں لے لیا ہے۔
خیال رہے کہ فلسطین میں اکتوبر کے شروع سے جاری تحریک کے دوران اسرائیلی فوج کی منظم ریاستی دہشت گردی کے نتیجے میں اب تک 76 فلسطینی شہید اور 1500 سے زائد زخمی ہوچکے ہیں۔