برطانیہ کی دیرینہ سیاسی جماعت "لیبرپارٹی” اور یورپی ملکوں کی سپر اسٹور کی سب سے بڑی چین”کے ڈی وی” نے اسرائیلی سیکیورٹی کمپنیوں اور مقبوضہ فلسطینی علاقوں میں قائم کردہ کارخانوں میں تیار ہونے والی مصنوعات کے بائیکاٹ کا اعلان کیا ہے۔
رپورٹ کے مطابق لیبر پارٹی اور یورپی فاسٹ فوڈ چین کی جانب سے اسرائیلی بائیکاٹ کے اعلان پرصہیونی میڈیا چراغ پا ہے۔ اسرائیلی حکومت کی جانب سے بھی بائیکاٹ کے فیصلے پر شدید رد عمل سامنے آیا ہے۔رپورٹ میں بتایا گیا ہے کہ لیبر پارٹی کی طرف سے باضابطہ طورپر اعلان کیا گیا ہے کہ جماعت اسرائیل کی سیکیورٹی کمپنیوں اور مقبوضہ عرب علاقوں میں قائم کالونیوں میں تیار ہونے والی مصنوعات کا بائیکاٹ کررہی ہے۔ اخباری رپورٹ کے مطابق لیبر پارٹی نے کہا ہے کہ وہ نہ صرف اسرائیلی سیکیورٹی کمپنیوں اور مقبوضہ عرب شہروں میں تیار کی جانے والی مصنوعات کا بائیکاٹ کررہی ہے بلکہ اسرائیلی کالونیوں میں معاونت کرنے والی غیرملکی فرموں کا بھی بائیکاٹ کرے گی۔ اس سلسلے میں برطانیہ کی سیکیورٹی کمپنی ” G4S ” جو پچھلے بارہ سال سے لیبر پارٹی کو سیکیورٹی گارڈز فراہم کررہی تھی بھی شامل ہے، کیونکہ یہ کمپنی برطانیہ کے علاوہ اسرائیل اور کئی دوسرے ملکوں میں بھی سیکیورٹی سروسز مہیا کررہی ہے۔
ادھر یورپی ملکوں کے سب سے بڑے سپر اسٹور چین "کے ڈی وی” کے برلن میں قائم ہیڈ کواٹر سے جاری کردہ بیان میں کہا گیا ہے کہ "کے ڈی وی "نے اسرائیل کی متنازع مصنوعات کی خریداری روکنے کا فیصلہ کیا ہے۔
معاریف کی رپورٹ میں کہا گیا ہے کہ لیبر پارٹی میں اسرائیلی مصنوعات کے بائیکاٹ کے اعلان پر رائے شماری کرائی گئی تو 16 میں سے 12 ارکان نے بائیکاٹ کی حمایت کی جب کہ چار نے مخالفت میں ووٹ ڈالا۔