منامہ (روز نامہ قدس ۔آن لائن خبر رساں ادارہ) بحرین کی آمریت مخالف سیاسی جماعت الوفاق نے شاہی حکومت کی جانب سے اسرائیل کے ساتھ تعلقات معمول پر لائے جانے کی کوششوں کو تاریخی غلطی قرار دیا ہے۔
روز نامہ قدس کو موصول ہونے والی اطلاعات کے مطابق منامہ میں جمعیت الوفاق کی جانب سے جاری ہونے والے بیان میں کہا گیا ہے کہ شاہی حکومت کا اسرائیل کی گود میں بیٹھنا ثابت کرتا ہے کہ آل خلیفہ خاندانی حکومت غیر جمہوری اور ناجائز ہے۔
بیان میں کہا گیا ہے کہ بحرینی حکمراں عرب اور اسلامی مسائل اور معاملات کو کوئی اہمیت نہیں دیتے بلکہ قومی امنگوں اور امیدوں کا مسلسل گلا گھونٹ رہے ہیں۔
اس سے پہلے الوفاق پارٹی کے سینیئر رکن ابراہیم سرحان نے ملک میں انسانی حقوق کی تشویش ناک صورت حال کی جانب اشارہ کرتے ہوئے کہا تھا کہ عوامی تحریک کو کچلنے میں آل خلیفہ حکومت کو اسرائیل کا بھرپور تعاون اور حمایت حاصل ہے۔
ادھر اسرائیلی اخـبار یدیعوت احارونوت نے جمعرات کے روز ایک ویڈیو کلپ جاری کیا ہے جس میں بحرین کے وزیر خارجہ خالد بن احمد آل خلیفہ کو یہ کہتے ہوئے دکھایا گیا تھا کہ اب وقت آگیا ہے کہ بحرین اور اسرائیل کے درمیان مکمل سفارتی تعلقات قائم کیے جائیں۔