اسرائیل کے عبرانی ذرائع ابلاغ نے خبردی ہے کہ گذشتہ روز تشکیل پانے والی نئی کابینہ میں وزیراعظم بنجمن نیتن یاھو کی جماعت’’لیکوڈ‘‘ اہم وزارتوں سے محروم رہی جس کے باعث پارٹی کے اندر سخت خلفشار پایا جا رہا ہے۔ ذرائع کے مطابق اہم وزارتیں دوسری اتحادی جماعتوں کو ملنے پر لیکوڈ کے ارکان سخت برہم ہیں اور انہوں نے وزیراعظم اور پارٹی سربراہ نیتن یاھو سے سخت ناراضی کا اظہار کیاہے۔
اسرائیل کے عبرانی اخبار’’یدیعوت احرنوت‘‘ کی رپورٹ کے مطابق اہم وزارتیں حاصل نہ ہونے پر لیکوڈ پارٹی کے ارکان نے نیتن یاھو سے سخت برہمی اور غم وغصے کا اظہار کیا ہے۔ ناراض ارکان کا کہنا ہے کہ آوی گیڈور لائبرمین کی جانب سے وزارت خارجہ کا قلم خالی ہونے کے بعد وزیراعظم نے اسے اپنی جماعت کے لیے مختص کیا ہے لیکن اس کے علاوہ کئی اہم وزارتیں دوسری جماعتوں کو دے دی گئی ہیں۔
اخبار لکھتا ہے کہ نیتن یاھو وزارت خارجہ کا قلم اپنی جماعت کے لیے رکھنا چاہتے ہیں۔ فی الحال یہ عہدہ لیبر پارٹی یا صہیونی یونین کو دیے جانے کا کوئی امکان نہیں ہے۔ ذرائع کے مطابق لیکوڈ کے ارکان صحت، تعلیم، دفاع اور مالیات جیسی اہم وزارتیں اپنے پاس رکھنے کے خواہاں تھے مگر نیتن یاھو نے یہ تمام وارتیں مخلوط اتحاد میں شامل دوسری جماعتوں میں بانٹ دی ہیں۔
بشکریہ:مرکزاطلاعات فلسطین