قابض صہیونی فوجیوں نے فلسطین کے مقبوضہ مغربی کنارے میں وزارت صحت کی ایک ایمبولینس پر حملہ کرکے گاڑی کی توڑپھوڑ کی اور اس کے ڈرائیور اور عملے کے دیگر افراد کو وحشیانہ تشدد کا نشانہ بنایا۔
مقامی فلسطینی ذرائع نے بتایا کہ اتوار کی شام قابض صہیونی فوجیوں نے فلسطینی محکمہ صحت کی ایمبولینس کو روکا اور گاڑی کے شیشے توڑںے کے بعد ڈرائیور سلیمان احمد اور اس کے ساتھ عملے کے دوسرے اہلکاروں کو زمین پر منہ کےبل لٹا کر گھونسوں ، مکوں اور لاتوں سے وحشیانہ تشدد کا نشانہ بنایا۔ذرائع کاکہنا ہے کہ قابض فوجیوں نے ایمبولینس میں رکھا بستر ڈرائیور کے منہ پر ڈال دیا۔ اسے گاڑی سے اتار نے کے بعد نیم برہنہ کیا گیا اور گاڑی کی بھی جامہ تلاشی لی گئی۔