مرکز اطلاعات فلسطین کے مطابق ڈاکٹر ابو مرزوق نے ان خیالات کا اظہار جمعہ کے روز مصری بارڈر فورس کی فائرنگ سے شہید ہونے والے فلسطینی نوجوان زکی الھوبی کے اہل خانہ سے تعزیت کے دوران کیا۔ انہوں نے کہا کہ فلسطینی لڑکے پر مصری فوج کی فائرنگ نہایت افسوسناک واقعہ ہے۔اس نوعیت کا واقعہ فلسطینی اور مصری تاریخی روایات اور تعلقات کے بھی برعکس ہے۔
رفح میں شہید الھوبی کی تعزیت کے لیے لگائے گئے ایک کیمپ سے خطاب کرتے ہوئے ڈاکٹر مرزوق نے کہا کہ میں اپنے مصری بھائیوں سے کہوں گا کہ وہ غزہ کے محصورین کو قتل کرنے کے بجائے ان کے لیے راستے کھولیں تاکہ وہ اسرائیل کے مسلط کردہ محاصرے کو توڑنے اور اپنی ضروریات کے حصول میں کامیاب ہوسکیں۔ انہوں نے کہا کہ سرحد پر فلسطینی لڑکے کی فائرنگ میں شہادت پر دکھ ہوا۔ مصری فوج نے ماضی میں کبھی ایسی کارروائی نہیں کی۔
انہوں نے کہا کہ مصری فوج کوغزہ کے محصورین سے گولی کی زبان میں بات کرنے کے بجائے ان کے مسائل کے حل میں مدد کرنی چاہیے۔ فلسطینیوں کا خون بہانے کے لیے اسرائیل ہی کافی ہے۔ مصری فوج کو ایسا کوئی قدم نہیں اٹھانا چاہیے جس کے نتیجے میں فلسطینی اور مصری اقوام کےدرمیان بھائی چارے کو نقصان پہنچے۔
یاد رہے کہ جمعہ کے روز مصری فوج کی فائرنگ سے رفح کے علاقے میں ایک فلسطینی لڑکا شہید اور تین افراد کو حراست میں لے لیا گیا تھا۔
بشکریہ:مرکزاطلاعات فلسطین