غزہ (روز نامہ قدس ۔آن لائن خبر رساں ادارہ) اسلامی تحریک مزاحمت (حماس) کے سیاسی شعبے کے سربراہ اسماعیل ھنیہ نے کہا ہے کہ فلسطینی قوم اس وقت چوراہے پر کھڑی ہے۔ ان کا کہنا ہے کہ حماس ہرطرح کےحالات سےنمٹنے کے لیے تیار ہے اور مشکل سے مشکل فیصلے کرنے میں بھی دیر نہیں کرے گی۔
روز نامہ قدس کو موصول ہونے والی اطلاعات کے مطابق اسماعیل ھنیہ کی طرف سے جاری ایک بیان میں کہا گیا ہے کہ ان کی جماعت اور فلسطینی تنظیموں کی قیادت نے جمعرات کے روز مصری حکام کے ساتھ غزہ میں جنگ بندی کے عمل کوآگے بڑھانے کے لیے اقدامات کیے ہیں۔
ان کا کہنا تھا کہ ہم سابقہ مذاکرات کی بنیاد پر ہونے والی بات چیت کو آگے بڑھا رہےہیں۔ انہوں نے کہا کہ ہم چوراہے پر کھڑے ہیں۔ حماس اور دیگر فلسطینی جماعتیں ہرطرح کے سینیاریو کا سامنا کرنے کے لیے تیار ہیں۔ فلسطینی قوم کے مفاد میں کوئی بھی مشکل فیصلہ کرنے میں تاخیر نہیں کریں گے۔ فلسطینی قوم مسلسل قربانیاں دے رہی ہے اور یہ سلسلہ مقاصد کے حصول تک جاری رہے گا۔ غزہ کی پٹی میں گذشتہ ایک سال سےجاری تحریک حق واپسی کے دوران فلسطینیوں نے اپنی جانوں کا نذرانہ پیش کرکے اس تحریک کو آگے بڑھایا ہے۔
انہوں نےکہا کہ آج 30 مارچ کو غزہ کی پٹی میں ہونے والا عظیم الشان ملین مارچ صیہونی دشمن کے لیے فلسطینیوں کی طرف سے واضح پیغام ہے کہ ہم اپنے حقوق کے حصول کے لیے ہرطرح کی قربانی دینے کے لیے تیار ہیں۔