فلسطینی قوم زندہ اور وسعت پذیر انتفاضہ کے سامنے کھڑی ہے:ھنیہ

(فلسطین نیوز۔مرکز اطلاعات) اسلامی تحریک مزاحمت ’’حماس‘‘ کے رہنما اور سابق وزیراعظم اسماعیل ھنیہ نے کہا ہے کہ سنہ 2016 ء تحریک انتفاضہ کو آگے بڑھانے اور اس کے ثمرات سمیٹنے کا سال ہے۔ ان کا کہنا ہے کہ فلسطینی قوم ایک زندہ وجاوید اور ہمہ جہت وسعت پذیر تحریک انتفاضہ کے سامنے کھڑی ہے۔

رپورٹ کے مطابق اسماعیل ھنیہ نے ان خیالات کا اظہار اسرائیلی دہشت گردی کے نتیجے میں جام شہادت نوش کرنے والے 22 سالہ حسن بزور کے اہل خانہ سے ٹیلیفون پر تعزیت کرتے ہوئے کیا۔حسن بزور کو جمعرات کی شام اسرائیلی فوجیوں نے گولیاں مار کر شہید کردیا تھا۔

اسماعیل ھنیہ کا کہنا تھا کہ فلسطینی عوام نے پچھلے سال اکتوبر میں جس تحریک انتفاضہ کا آغازکیا اسے منطقی انجام تک پہنچایا جائے گا۔ انتفاضہ القدس کا دائرہ اور اثرات تیزی سے وسعت اختیار کررہے ہیں۔ ایک غاصب اور قابض دشمن کے خلاف فلسطینیوں کے پاس تحریک انتفاضہ موثر ہتھیار ہے۔

حماس رہنما کا کہنا تھا کہ فلسطینی قوم نے وطن کی آزاد اور ظلم دشمن کے ظلم کے خلاف قربانیوں کی لازوال داستانیں رقم کی ہیں۔ شہداء کی قربانیاں رائیگاں نہیں جائیں گی۔