(فلسطین نیوز۔مرکز اطلاعات) حماس کے ترجمان سامی ابو زہری نے اسرائیل کی جانب سے غزہ کا محاصرہ مزید سخت کئے جانے کے بارے میں خبردار کرتے ہوئے عالمی برادری سے اس صورت حال کا فوری نوٹس لینے کی اپیل کی ہے۔
انہوں نے علاقائی اور بین الاقوامی اداروں اور تنظیموں سے بھی اپیل کی ہے کہ وہ غزہ کی بحرانی صورت حال کے حوالے سے اپنی ذمہ داریوں پرعمل کریں۔فلسطینی حکام اس سے پہلے بھی کئی بار امدادی اداروں سے اپیل کر چکے ہیں کہ وہ غزہ کی تشویشناک صورت حال کے حوالے سے اپنے وعدوں کو پورا کریں۔
قابل ذکر ہے کہ عالمی اداروں اور عرب ملکوں نے غزہ کی تعمیرنو اور امداد کی فراہمی کے وعدوں پر تاحال عمل نہیں کیا جس کے نتیجے میں پندرہ لاکھ کی آبادی والے اس علاقے میں انسانی صورت حال ابتر ہوتی جا رہی ہے۔
اسرائیل نے سن دو ہزار سات سے غزہ کا شدید محاصرہ کر رکھا ہے اور دوسری جانب مصر نے بھی بیرونی دنیا کے ساتھ غزہ کے رابطے کی واحد رفح گذرگاہ بند کر دی ہے۔