مرکزاطلاعات فلسطین کے مطابق حماس کے ترجمان حسام بدران نے اپنے ایک بیان میں کہا کہ اسرائیلی خفیہ ادارے کی جانب سے الزام تراشی کا سلسلہ جاری ہے اور بار بار حماس پر ملائیشیا میں کارکن بھرتی کرنے کا الزام عاید کیا جاتا ہے۔ اسرائیل کے اس نوعیت کے تمام الزامات قطعی بے بنیاد اور جھوٹ کا پلندہ ہیں۔
حماس کے ترجمان کا کہنا تھا کہ اسرائیل کی جانب سے ملائیشیا میں کارکن بھرتی کرنے اور وہاں پرا پنا نیٹ ورک بنانے کے الزامات دراصل ایک سازش ہیں جس کا مقصد فلسطینی طلباء کا بیرون ملک تعاقب کرنا اور مغربی کنارے کے طلباء کو بیرون ملک حصول علم کے لیے جانے سے روکنا ہے۔
اسرائیلی حکومت اسی طرح کے نام نہاد دعوئوں کے ذریعے فلسطینی طلباء پر بیرون ملک تعلیم کے دروازے بند کررہی ہے۔ بیرون ملک تعلیم کے حصول کے لیے گئے طلباء کی واپسی پرانہیں حراست میں لے لیا جاتا ہے جس کا کوئی جواز نہیں ہوتا۔ ان طلباء پربھی بیرون ملک دعوتی اور تنظیمی سرگرمیوں کا الزام عاید کیا جاتا ہے۔ حماس اس طرح کے تمام الزامات کو مستردکرتی ہے۔
بشکریہ:مرکزاطلاعات فلسطین