(روزنامہ قدس ۔آنلائن خبر رساں ادارہ )قابض اسرائیلی فوج کے مظالم کے خلاف برسر پیکار فلسطینی مزاحمتی تنظیم حماس نے غزہ کے شہریوں میں رابطے بڑھانے اور محبتوں میں اضافے کے لیے بڑے اور وسیع پیمانے پر عید ملن تقریبات کے آغاز کی مہم شروع کردی ،مزکورہ مہم کے تحت حماس کی قیادت غزہ کے 600 خاندانوں سے ملاقات کرے گی۔
تفصیلات کے مطابق حماس کے سیاسی شعبے کے سربراہ اسماعیل ھنیہ نے عید ملن کے حوالےسے جاری کردہ اپنے ایک پیغام میں کہا ہے کہ اس مہم کا مقصد جماعت حماس کی قیادت اور عام فلسطینی شہریوں کے درمیان پائے جانے والے فاصلے کم کرنا ہے۔ انہوں نے بتایا کہ غزہ میں حماس کے سیاسی شعبے کے صدر یحییٰ السنوار اور غزہ کی پوری قیادت اس مہم میں بھر پور طریقے سے شرکت کرے گی۔
ذرائع کے مطابق عید ملن مہم کے دوران حماس کی قیادت غزہ کی پٹی کے مختلف علاقوں کے دورے کے دوران شہریوں کے اجتماعات میں شرکت کرکے انہیں عید کی مبارک باد پیش کرنے کے ساتھ ان کے مسائل کو جاننے کی کوشش کرے گی اور انکے حل کے لیے موثر تجاویز پیش کرے گی۔