‘اعلان بالفور’باطل فیصلہ تھا،قابض دشمن کے خلاف جنگ جاری رکھیں گے:حماس

اسلامی تحریک مزاحمت حماس نے تقسیم فلسطین اور عرب علاقوں میں اسرائیل ریاست کے قیام کی سازش کے لیے طے پائے” اعلان بالفور ” کو انسانی تاریخ کا سنگین جرم قرار دیتے ہوئے برطانیہ پر زور دیا ہے کہ وہ بالفور ڈیکلریشن کرانے کا اپنا قصور تسلیم کرے۔ حماس کا کہنا ہے کہ اعلان بالفور ایک باطل فیصلہ تھا جس کے نتیجے میں فلسطینیوں کے بنیادی حقوق ان سے چھین لیے گئے۔ آج فلسطینی اپنے وطن کی آزادی کے جدو جہد کررہے ہیں۔ یہ جدو جہد منزل کے حصول تک جاری رہے گی۔

رپورٹ کے مطابق فلسطینی حماس کی جانب سب معاہدہ بالفور کے 98 سال مکمل ہونے کی مناسبت سے یہ بیان جاری کیا گیا

بیان میں کہا گیا اسرائیل کو ایک آئینی ریاست تسلیم کرنے کا کوئی جواز نہیں ہے۔ وقت گذرنے کے ساتھ ساتھ کسی قسم کے حقوق ساقط نہیں ہوجاتے۔ فلسطینی عوام بھی اپنے دیرینہ حقوق اور مطالبات کے لیے ہرفورم پرکوششیں جاری رکھیں گے۔

بیان میں کہا گیا کہ ” بالفور ڈیکلریشن ” تاریخ انسانی کا سنگین جرم اور فلسطینی عوام کے ساتھ بدترین مذاق ہے۔ تقسیم فلسطین کا شرمناک اور مذموم معاہدہ کرانے کی تمام ترذمہ داری برطانیہ پرعائد ہوتی ہے۔ برطانیہ کو اپنے اس سنگین جرم کو تسلیم کرتے ہوئے فلسطینیوں کو انصاف فراہم کرنا چاہیے۔

حماس کی جانب سے فلسطین میں جاری تحریک انتفاضہ کو مضبوط بنانے کے ساتھ ساتھ اس تحریک کے شروع کرنے پرپوری قوم کومبارک باد پیش کی۔ بیان میں کہا گیا کہ فلسطینی عوام نے آج اپنی تحریک آزادی اور تحریک انتفاضہ کے ذریعے یہ ثابت کردیا ہے کہ اعلان بالفور کے ایک سو سال گذرنے کے بعد بھی فلسطینی قوم اپنے اوپر ڈھائے جانے والے مظالم کو فراموش نہیں کرسکی۔ ہم آج بھی وطن کی آزادی کے لیے پوری قوت سے جدو جہد کر رہے ہیں۔