(روزنامہ قدس ۔آن لائن خبر رساں ادارہ) حماس کے سربراہ کا کہنا ہے کہ مقبوضہ فلسطین میں سیاسی اختلافات کے خاتمے کیلئے ضروری ہے کہ غرب اردن اور غزہ ک پٹی میں دو الگ الگ حکومتوں کے بجائے ایک متحدہ حکومت تشکیل دی جائے۔
فلسطین کے سرکاری ٹی وی چینل کو دیئے گئے ایک انٹرویو میں اسلامی تحریک مزاحمت ‘حماس’کے سیاسی شعبے کے سربراہ اسماعیل ھنیہ نے کہا ہےکہ فلسطینی قوم اس وقت نازک اور پیچیدہ دور سے گذر رہی ہے۔ ایسے میں فلسطینی دھڑوں میں اتفاق اور اتحاد ناگزیر ہےجس کیلئے تمام فلسطینی قوتوں پر مشتمل متحدہ حکومت تشکیل دی جائے تاکہ فلسطینی قوتوں کے درمیان پائے جانے والے اختلافات کا خاتمہ کیا جاسکے۔
انہوںنے کہا کہ غرب اردن اور غزہ میں دو الگ الگ حکومتوں کے بجائے ایک حکومت تشکیل پر زور دیتے ہوئے کہا ہے کہ حکومت کی ذمہ داریوں میں فلسطینیوں میں اتحاد، فلسطینی اتھارٹی کے اداروں میں وحدت اور اس کے ساتھ ساتھ پارلیمانی، صدارتی اور نیشنل کونسل کے انتخابات کے لیے ماحول ساز گار کرنا ہے۔
انہوں نے مزید کہا کہ قومی حکومت کی ایک اہم ذمہ داری غزہ پر اسرائیل کی طرف سے مسلط کی گئی پابندیوںکا خاتمہ ہے۔