صیہونی دہشتگردی جاری: غزہ بدترین قحط کا شکار، لاکھوں فلسطینی موت کی دہلیز پر

(روزنامہ قدس – آنلائن خبر رساں ادارہ) مقبوضہ فلسطین کے محصور شہر غزہ میں انسانی بحران اپنی انتہا کو پہنچ چکا ہے، اور غیر قانونی صیہونی ریاست اسرائیل کی ریاستی دہشتگردی دنیا کے سامنے کھلی کتاب کی مانند ہے۔ اقوام متحدہ اور عالمی ادارے مسلسل خبردار کر رہے ہیں کہ غزہ قحط، نقل مکانی، اور نسل کشی جیسے جرائم کا شکار ہے، لیکن عالمی برادری کی مجرمانہ خاموشی صیہونی جرائم کو مزید بے لگام بنا رہی ہے۔

■ قحط کی دہلیز پر کھڑا غزہ

اقوامِ متحدہ کے ادارۂ خوراک (WFP) نے خبردار کیا ہے کہ اگر غزہ میں فوری، منظم اور محفوظ طریقے سے امدادی سامان نہ پہنچایا گیا تو لاکھوں فلسطینیوں کی زندگیاں خطرے میں پڑ جائیں گی۔ ادارے نے واضح طور پر کہا کہ صرف "امداد کی اجازت” کافی نہیں، بلکہ یہ ضروری ہے کہ امداد محصور علاقوں تک بلا رکاوٹ اور بغیر کسی فوجی رکاوٹ کے پہنچے۔

مگر حقیقت یہ ہے کہ غیر قانونی صیہونی ریاست نے 2 مارچ سے غزہ کی تمام زمینی گزرگاہیں بند کر رکھی ہیں، جس کے باعث پورا علاقہ شدید انسانی بحران کی لپیٹ میں ہے۔ اس وقت بچے بھوک سے بلک رہے ہیں، بوڑھے دوا کے بغیر مر رہے ہیں، اور عورتیں بنیادی سہولیات سے محروم ہیں۔

■ امریکی سرپرستی میں امداد کی تقسیم یا جبری نقل مکانی؟

ایسے وقت میں جب غزہ کو مکمل انسانی امداد کی ضرورت ہے، صیہونی ریاست اور امریکہ ایک نیا منصوبہ متعارف کرا رہے ہیں جس کے تحت امدادی سامان صرف مخصوص علاقوں میں تقسیم کیا جائے گا۔ یہ منصوبہ "غزہ فاؤنڈیشن فار ہیومینیٹرین” نامی نئی تنظیم کی نگرانی میں چلایا جائے گا، جسے سوئٹزرلینڈ میں رجسٹر کیا گیا ہے اور جس کے پیچھے مشرق وسطیٰ کے لیے امریکی ایلچی اسٹیو ویٹکوف کا ہاتھ ہے۔

اس منصوبے کے تحت جنوبی غزہ میں صرف چار مراکز پر امداد دی جائے گی، جن کی حفاظت امریکی مسلح افواج کریں گی، اور صیہونی ریاست کی فوج فضائی نگرانی کرے گی۔ یہ ایک منظم سازش ہے تاکہ فلسطینیوں کو شمالی غزہ سے زبردستی جنوبی علاقوں کی طرف دھکیلا جائے اور آخرکار انہیں مکمل طور پر بے دخل کر دیا جائے — بالکل ویسا ہی منصوبہ جیسا سابق امریکی صدر ڈونلڈ ٹرمپ نے اپنی صدارت کے دوران پیش کیا تھا۔

■ امداد نہیں، جبری ہجرت کا منصوبہ

اسرائیلی فوج کے ریڈیو نے خود اعتراف کیا ہے کہ امداد کی تقسیم کا یہ منصوبہ دراصل فلسطینی عوام کو ان کے گھروں سے ہٹانے اور انہیں ایک مخصوص علاقے "المواسی” میں محصور کرنے کی کوشش ہے، جہاں وہ صیہونی نگرانی میں محدود کر دیے جائیں گے۔ یہ بین الاقوامی انسانی قوانین کی صریح خلاف ورزی اور جنگی جرم ہے۔

■ قتل عام اور تباہی کے اعداد و شمار

7 اکتوبر 2023ء سے شروع ہونے والی صیہونی جارحیت نے غزہ کو کھنڈر میں تبدیل کر دیا ہے۔ اب تک 176,000 سے زائد فلسطینی شہید یا زخمی ہو چکے ہیں، جن میں اکثریت بچوں اور عورتوں کی ہے۔ 11,000 سے زائد افراد لاپتہ ہیں، جن کا اب تک کوئی سراغ نہیں۔ رفح جیسے علاقے زمین بوس کر دیے گئے ہیں، جہاں کی گلیاں ملبے، لاشوں اور خون سے بھری پڑی ہیں۔ اور اسی مقام پر صیہونی 36ویں فوجی ڈویژن تعینات ہے، جو دنیا کے سامنے "دہشت گردی کے خلاف آپریشن” کا جھوٹا لبادہ اوڑھے ہوئے ہے۔

■ دنیا کی خاموشی: سوالیہ نشان

اس تمام بربریت کے باوجود عالمی برادری، اقوام متحدہ، اور انسانی حقوق کی تنظیمیں صرف بیانات تک محدود ہیں۔ نہ تو کوئی عملی قدم اٹھایا گیا، نہ ہی غیر قانونی صیہونی ریاست کو کوئی پابند کیا گیا کہ وہ انسانی امداد کی راہ میں رکاوٹیں ختم کرے۔

■ مزاحمت موجود ہے اور مضبوط ہے

ان تمام مظالم کے باوجود فلسطینی عوام کے حوصلے پست نہیں ہوئے۔ غزہ میں مزاحمتی قوتیں نہ صرف موجود ہیں بلکہ تمام تر ناکہ بندی، بھوک اور بمباری کے باوجود ڈٹی ہوئی ہیں۔ یہ عوام اپنے حقِ آزادی اور خود ارادیت کے لیے آج بھی سینہ سپر ہیں۔