(روز نامہ قدس ۔آنلائن خبر رساں ادارہ ) حماس کا کہنا ہے کہ صیہونی ریاست رہائشی علاقوں پر اپنے سنگین جنگی جرائم کی پوشی اور جواز بنانے کیلئے مسلسل ڈھٹائی کا مظاہرہ کررہی ہے۔
مقبوضہ فلسطین میں صیہونی ریاستی دہشتگردی کے خلاف برسرپیکار اسلامی مزاحمتی تحریک (حماس) کے ترجمان حازم قاسم نے امریکا میں صیہونی سفیر کی جانب سے ایسی سی ایٹڈ پریس (اے پی ) کی عمارت پر بمباری کی وضاحت پر سخت ردعمل کا اظہارکرتے ہوئے کہا ہےکہ صیہونی ریاست شہری آبادیوں کو وحشیانہ بمباری سے نشانہ بنانے کے سنگین جنگی جرائم کی پردہ پوشی کیلئے مسلسل جھوٹ اور ڈھٹائی کا مظاہرہ کررہی ہے، بین الاقوامی چینلز اور نیوز ایجنسیوں کے زیر استعمال عمارت الجالا ٹاور کو نشانہ بناتے ہوئے اپنے جرم کو جواز بنانے کی ناکام کوشش ہے۔
حازم قاسم کا کہنا ہے کہ صیہونی فوج نے صحافتی تنظیموں کے زیر استعمال عمارت کو اس لئے تباہ کیا کیونکہ وہ نہیں چاہتے کہ غزہ میں صیہونی ریاست کی وحشیانہ بمباری اور سنگین انسانی حقو ق کی خلاف ورزیاں دنیا کے سامنے آئیں اس لئے عمارت میں حماس کی موجودگی کا بیہودہ الزام عائد کیا گیا جس کا کوئی ثبوت نہیں پیش کیا گیا۔
واضح رہے کہ اسرائیلی بمباری سے مکمل طورپر تباہ ہونے والی عمارت الجالاٹاورایک کثیر المنزلہ عمارت تھی جس میں الجزیرہ اور ایسی سی ایٹڈ پریس سمیت متعدد مقامی اور بین الاقوامی نشریاتی اداروں کے دفاتر موجود تھے۔