کراچی (روزنامہ قدس ـ آنلائن خبر رساں ادارہ) فلسطین میں اسلامی مزاحمتی تحریک مزاحمت حماس کے سینئر رہنما ڈاکٹر مروا ن ابو راس نے کہا ہے کہ آج فلسطینی عوام پر مشکلات کے پہاڑ ٹوٹ رہے ہیں، ہر انسان اور مسلمان کی ذمہ داری کے کہ وہ فلسطین کی مدد کریں۔ ان خیالات کا اظہار انہوںنے کراچی آمد پر فلسطین فائونڈیشن پاکستان کے مرکزی دفتر میں سرپرست اراکین سے ملاقات کے دوران کیا۔ ان کے ساتھ فرینڈز آف فلسطین کے ڈاکٹر بلال اسطل اور فلسطینی رہنما زید ابو زید بھی شریک تھے۔
فلسطین فائونڈیشن پاکستان کے سرپرست اراکین بشمول ڈاکٹر صابر ابو مریم، جماعت اسلامی کے نائب امیر مسلم پرویز، ایم کیو ایم پاکستان کے سابق رکن سندھ اسمبلی محفوظ یار خان ، مجلس وحدت مسلمین کے رہنما علامہ باقر زیدی، جمعیت علماء پاکستان کے علامہ عقیل انجم قادری او سابق رکن قومی اسمبلی محمد حسین محنتی نے مہمانوں کا استقبال کیا۔
حماس رہنما کاکہنا تھا کہ فلسطین کے عوام عالمی بے حسی ، امریکی او یورپی دہشتگردی ، مسلم امہ کی خاموشی سمیت اسرائیلی جارحیت کا مقابلہ کر رہے ہیں۔ان کاکہنا تھا کہ مسجد اقصیٰ خطرے میں ہے اور ہم سب کی ذمہ داری ہے کہ القدس کی حفاظت کریں۔انہوں نے غزہ میں سردی کی لہر اور بارشوں کی زیادتی کی وجہ سے متاثر ہونے والے لاکھوں فلسطینیوں کے لئے فوری مدد کی اپیل کی ۔
ملاقات کے دوران فلسطین فائونڈیشن پاکستان کے رہنمائوں نے فلسطینی رہنمائوں کو یقین دلایا کہ پاکستان کے عوام فلسطین کے ساتھ ہیں اور فلسطین فائونڈیشن پاکستان اپنے فلسطینی بھائیوں کو مشکل وقت میں تنہا نہیں چھوڑے گی۔ اس موقع پر حماس رہنمائوںنے فلسطین فائونڈیشن پاکستان کی سرگرمیوں کو سراہتے ہوئے تعریف کی اور کہا کہ عوام میں بیداری اور شعور و آگہی کا
سلسلہ جاری رہنا چاہئیے۔ اس موقع پر مختار رضا اور اسفند یار خان ایڈوکیٹ بھی موجود تھے۔
