(روز نامہ قدس ۔آنلائن خبر رساں ادارہ ) قطر کے وزیر خارجہ نے کہا کہ جب تک فلسطینیوں کی خواہشات کے مطابق فلسطین میں امن قائم نہیں ہوگا اس وقت تک قطر و اسرائیل کے درمیان کسی قسم کے تعلقات معمول پر نہیں آسکتے۔
ذرائع کے مطابق گذشتہ روز قطر کےوزیر خارجہ شیخ محمد بن عبد الرحمن آل ثانی نے اپنے ایک بیان میں اسرائیل کو واضح کیا ہے کہ مقبوضہ فلسطین کے باشندوں کی خواہشات اور امنگوں کےخلاف قطر کا اسرائیل کے ساتھ تعلقات کو معمول پر لانا نا ممکن ہے۔
بیان میں شیخ محمد بن عبد الرحمن آل ثانی نے کہا ہے کہ جب تک فلسطینیوں کی خواہشات کے مطابق مقبوضہ فلسطین میں امن قائم نہیں ہوجاتا قطر و اسرائیل کے درمیان کسی قسم کی نارملائزیشن نہیں ہوسکتی۔
واضح رہے کہ گذشتہ ایک ہفتہ قبل غزہ میں قابض ریاست اور اسلامی تحریک مزاحمت کے درمیاں 11 روز سے جاری شدید لڑائی کے بعد جنگ بندی کی کوششوں میں دو اسلامی ممالک قطراور مصر نے اہم کردار ادا کیا ہے جس کا اعتراف امریکی صدر جوبائیڈن کی جانب سے بھی وائٹ ہاؤس میں غزہ سے متعلق بریفنگ میں کیاگیا۔