قاہرہ : جنگ بندی مذاکرات جاری، جب تک قبضہ رہے گا ہتھیاروں پر گفتگو نہیں ہوگی: حماس کا اعلان

النونو نے زور دے کر کہا کہ فلسطینی مزاحمت کے ہتھیار قابلِ گفت و شنید نہیں،  جب تک فلسطین مقبوضہ رہے گا غیرقانونی صیہونی ریاست اسرائیل کے خلاف مزاحمت جاری رہے گی۔ انہوں نے کہا کہ حماس اور دیگر مزاحمتی دھڑے غزہ پر جاری اسرائیلی جارحیت کے خاتمے کے لیے مسلسل کوششیں کر رہے ہیں اور ایک سنجیدہ حل کی تلاش میں ہیں، مگر اسرائیلی وزیراعظم بنجمن نیتن یاہو کی حکومت خود ان مذاکرات میں رکاوٹ ہے۔

حماس رہنما کے مطابق، ثالثی عمل نیتن یاہو کی ضد اور سیاسی مقاصد کے باعث متاثر ہوا، تاہم رمضان کے اختتام پر ثالثوں کی پیش کردہ تجویز پر حماس نے اتفاق کیا، باوجود اس کے کہ انہیں یقین ہے نیتن یاہو جنگ کو طول دے کر اپنا اقتدار بچانے کی کوشش کر رہے ہیں۔ حماس کے مطابق مذاکرات کی بحالی اسرائیلی ہٹ دھرمی کے باوجود ایک ضروری قدم ہے۔

طاہر النونو نے فلسطینی صدر محمود عباس کے حالیہ بیانات کو سخت تنقید کا نشانہ بناتے ہوئے کہا کہ وہ قومی وحدت کو نقصان پہنچا رہے ہیں۔ انہوں نے کہا کہ فلسطینی صدر کی قیادت میں اتحاد ممکن نہیں، کیونکہ ان کے بیانات مزاحمت کی حمایت کے بجائے قابض قوت کے بیانیے کو تقویت دیتے ہیں، جو فلسطینی کاز کے لیے نقصان دہ ہے۔