خیال رہے کہ یورپی یونین کی انسانی حقوق کی ایک عدالت آج بدھ کو حماس کا نام دہشت گرد گروپوں کی فہرست سے خارج کرنے کی درخواست پر غور کررہی ہے۔ غالب امکان ہے کہ آج شام تک آنے والے فیصلے میں یورپی عدالت حماس کو دہشت گرد گروپوں کی فہرست سے خارج کرنے کا فیصلہ صادر کرے گی۔
مرکزاطلاعات فلسطین کے مطابق حماس کے سیاسی شعبے کے نائب صدر ابو مرزوق نے اپنے ایک بیان میں کہا کہ یورپی عدالت سے حماس کا نام دہشت گرد گروپوں سے نکالنے کا فیصلہ فلسطینی قوم اورآزادی کے لیے جاری مسلح جدو جہد کرنےوالوں سے کھلی حمایت کا اظہار ہے۔
ابو مرزوق کا کہنا تھا کہ عالمی برادری فلسطین کے بارے میں اپنے موقف میں جو غلطیاں کرتی رہی ہےاب ان کی اصلاح کی کوشش کررہی ہے۔ انہوں نے یورپ کی انسانی حقوق عدالت کا شکریہ ادا کیا اور مطالبہ کیا کہ یورپی ممالک کی حکومتیں اس فیصلے پرعمل درآمد کرتے ہوئے حماس پرپابندیاں اٹھانے کا اعلان کریں۔
ڈاکٹر موسیٰ ابو مرزوق کا کہنا تھا کہ ظلم ہمیشہ نہیں رہتا۔ ایک وقت آتا ہے جب مظلوم کو اس کا حق ملتا ہے اور وہ فتح وکامرانی سے ہمکنار ہوجاتا ہے۔ فلسطینی قوم کے ساتھ بے انتہا نا انصافیاں ہوئی ہیں۔ ان میں ایک بڑی نا انصافی سنہ 2003 ء میں حماس کو دہشت گرد گروپوں میں شامل کیے جانے کا فیصلہ بھی تھا۔ یہ ایک غیرقانونی اور غیرآئینی اقدام تھا۔ آج یورپ کی عدالتیں بھی اس غیرقانونی اقدام کی مخالفت کر رہی ہیں۔
بشکریہ:مرکزاطلاعات فلسطین