مرکزاطلاعات فلسطین کے مطابق یمن میں حماس کے مندوب عبدالمعطی زقوت نے ایک انٹرویو میں کہا ہے کہ صنعاء میں جماعت کے دفاتر پر حوثیوں کے حملوں سے متعلق خبروں میں کوئی صداقت نہیں ہے۔ حماس کے تمام دفاتر محفوظ ہیں۔
ایک سوال کے جواب میں انہوں نے کہا کہ حماس کے یمن کی تمام سیاسی جماعتوں کے ساتھ یکساں تعلقات قائم ہیں۔ یمن کی تمام سیاسی قوتیں مسئلہ فلسطین کی حامی اور مدد گار ہیں۔ ان کی جانب سے ایسا کوئی قدم نہیں اٹھایا جا سکتا جس سے قضیہ فلسطین کو نقصان پہنچنے کا اندیشہ ہو۔
خیال رہے کہ سوموار کے روز بعض عرب اخبارات نے خبرشائع کی تھی کہ صنعاء میں حماس کے دفاتر پر نقاب پوش حوثی عسکریت پسندوں نے حملہ کیا ،دفاترمیں قیمتی سامان کی توڑپھوڑ کی اور ریکارڈ تلف کردیا۔ تاہم سرکاری سطح پراس خبر کی تصدیق نہیں ہوسکی۔ حماس نے باضابطہ طورپران اطلاعات کو قطعی بے بنیاد قراردیا ہے۔
بشکریہ:مرکزاطلاعات فلسطین