(روزنامہ قدس ۔آن لائن خبر رساں ادارہ) حماس کے سینئر عہدیدار نے کہا کہ غزہ میں کورونا وائرس کے پہلے کیس کی اطلاع ملتے ہی حماس نے غیر معمولی حفاظتی انتظامات مکمل کرلیے تھے یہی وجہ ہے کہ ہم نے غزہ میں اس وباء کو پھیلنے سے پہلے ہی روک لیا۔
اسلامی تحریک مزاحمت ‘حماس’ کی آفیشل ویب سائٹ کو دیے گئے ایک انٹرویو میں جماعت کے سیاسی شعبے کے سینیر رکن خلیل الحیہ نے کہا ہے کہ ان کی جماعت کی تنظیم، مالیات اور لاجسٹک شعبے نے حکومتی اداروں کے ساتھ مل کر غزہ میں کورونا وائرس کی روک تھام کے لیے غیرمعمولی اور بروقت اقدامات کیے ہیں جس کی وجہ سے آج غزہ دیگر ممالک کے مقابلے میں بہت محفوظ ہے ، حماس نے غزہ میں کورونا وائرس کے پہلے کیس کی اطلاع کے فوری بعد تمام حفاظتی انتظامات کرلیے تھے۔
انھوں نے بتایا کہ غزہ میں مشترکہ کرائسز سیل قائم کیا جہاں چوبیس گھنٹے کارکردگی کی اعلیٰ سطح سے جانچ کی جاتی رہی ہے، غزہ میں کرونا کے مشتبہ مریضوں کے لیے دو الگ الگ مقامات پر ایک ہزار کمروں کے فیلڈ اسپتال قائم کیے اور ان میں تمام طبی لوازمات اور ادویات کی فراہمی کو یقینی بنایا۔