واشنگٹن مغربی کنارے اور القدس میں یہودی آبادکاری کی حمایت کر رہا ہے: عزت رشق

اسلامی تحریک مزاحمت [حماس] کے سیاسی شعبے کے رکن عزت الرشق کا کہنا ہے کہ مغربی کنارے اور القدس میں یہودی بستیوں کی تعمیر کے خلاف اقوام متحدہ میں مذمتی قرارداد منظوری کی راہ میں امریکی کے تاخیری حربے شرمناک اسرائیل نوازی کا مظہر ہیں۔ سماجی رابطے کی ویب سائٹ ‘فیس بک’ پر اپنے بیان میں عزت الرشق نے کہا: "اقوام متحدہ میں یہودی آبادکاری کے خلاف مذمتی قرارداد کی منظوری کو تعطل کا شکار کرنا شرمناک اسرائیل نوازی اور فلسطینیوں اور مقدسات کے خلاف جرائم جاری رکھنے پر صہیونیوں کی حوصلہ افزائی ہے۔”یاد رہے گزشتہ سوموار اسرائیل نے شمالی القدس کی رمات شلومو کالونی میں یہودیوں کے لئے 1500 نئے رہائشی یونٹس تعمیر کرنے کی منظوری دی جس پر فلسطین میں شدید تنقید کی جا رہی ہے۔ اقوام متحدہ میں فلسطین کو غیر رکن مبصر ملک کا درجہ ملنے کے بعد سے اسرائیل مقبوضہ فلسطین میں نئی یہودی بستیوں کی تعمیر کے چار منصوبوں کا اعلان کر چکا ہے۔گزشتہ روز یو این سیکیورٹٰی کونسل میں امریکا کے سوا تمام رکن ملکوں نے مشرقی القدس اور غرب اردن کی یہودی بستیوں میں نئے مکانات تعمیر کرنے کے اسرائیلی فیصلے کی مذمت کی۔