مرکز اطلاعات فلسطین کے مطابق مصری ذرائع ابلاغ میں شائع وزیرانصاف محفوظ صابر کے نام منسوب ایک بیان میں ان کا کہنا ہے کہ جو کمیٹی کالعدم اخوان المسلمون کے اثاثوں کی ضبطی کے لیے قائم کی گئی وہی حماس کے اثاثےبھی ضبط کرے گی۔
مصری وزیر انصاف کا کہنا ہے کہ عدالت کے فیصلے کے بعد حماس ایک دہشت گرد تنظیم ہے جو مصر کی قومی سلامتی کے لیے خطرہ ہے۔ مصر کی سرزمین میں داخل ہونے والے اس کے کسی بھی رہ نما کو حراست میں لیا جائے گا اور ملک میں موجود حماس کے تمام مراکز کو بند کرنے کےبعد جماعت کے اثاثے منجمد کیے جائیں گے۔
مصری وزیر کا کہنا تھا کہ عدالت کی جانب سے حماس کو دہشت گرد تنظیم قرار دیے جانے سے متعلق فیصلے کو کسی دوسری عدالت میں چیلنج نہیں کیا جا رہا ہے بلکہ عدالتی فیصلے پر اس کی روح کے مطابق عمل درآمد کیا جائے گا۔ عدالتی فیصلے کے بعد حکومت کی ذمہ داری ہے کہ وہ حماس کے تمام اثاثے ضبط کرلے۔
خیال رہے کہ چند روز پیشتر مصر کی ایک مقامی عدالت نے حماس کو دہشت گرد تنظیم قرار دیا تھا۔ مصری عدالت کا موقف ہے کہ حماس جزیرہ نما سینا میں سرگرم عسکری گروپوں کی معاونت کررہی ہے جو مصری فوج پر حملوں میں ملوث ہیں۔ تاہم حماس کی جانب سے مصری الزامات کو بے بنیاد اور گمراہ کن قرار دیا گیا ہے۔
بشکریہ:مرکزاطلاعات فلسطین