مرکزاطلاعات فلسطین کے مطابق حماس کے ترجمان ڈاکٹر سامی ابو زھری نے اپنے ایک بیان میں کہا کہ قومی حکومت کو تمام فلسطینی ملازمین کے ساتھ انصاف اور مساوات کے اصول کے تحت ہی سلوک کرنا ہوگا۔ اگر قومی حکومت کی طرف سے مغربی کنارے میں الگ اور غزہ کی پٹی میں الگ اصول اختیار کیا گیا تو یہ قومی مفاہمت کے ایجنڈے کی کھلی خلاف ورزی ہوگی۔
انہوں نے فلسطینی قومی حکومت سے مطالبہ کیا کہ وہ اپنے اوپر سرکاری ملازمین کے ساتھ امتیازی سلوک کرنے کا الزام ختم کرنے کے لیے غزہ کے سرکاری ملازمین کو بروقت تنخواہوں کی ادائی کا سلسلہ شروع کرے۔
خیال رہے کہ فلسطین میں ایک سال قبل بننے والی قومی حکومت نے غزہ کی پٹی کے سرکاری ملازمین کی تنخواہوں کی ادائی کے حوالے سے لاپرواہی کا مظاہرہ کیا تھا۔ قومی حکومت کی زیادہ تر توجہ مغربی کنارے پر مرکوز رہی ہے جس کے باعث جنگ سے تباہ حال غزہ کی پٹی کے عوام کو ریلیف فراہم نہیں کیا جاسکا۔
بشکریہ:مرکزاطلاعات فلسطین