قابض اسرائیلی رکاوٹیں یرغمالیوں کی لاشوں کی برآمد میں حائل، حماس

(روزنامہ قدس ـ آنلائن خبر رساں ادارہ) فلسطین کی مزاحمتی تحریک حماس کا کہنا ہے کہ غزہ میں تباہ شدہ سرنگوں سے غاصب اسرائیلی یرغمالیوں کی لاشیں نکالنے میں وقت لگ سکتا ہے۔

غزہ امن معاہدے کے تحت حماس اب تک دس صہیونی یرغمالیوں کی لاشیں ریڈ کراس کے سپرد کر چکی ہے جبکہ قابض جنگی مجرم وزیراعظم کا کہنا ہے کہ حماس کو تمام یرغمالیوں کی باقیات واپس کرنا ہوں گی۔اس حوالے سے حماس کا کہنا ہے کہ یرغمالیوں کی لاشوں کی واپسی میں وقت لگ سکتا ہے کچھ لاشیں تباہ شدہ سرنگوں میں دفن ہیں جبکہ متعدد لاشیں اب بھی ملبے تلے دبی ہوئی ہیں۔

فلسطینی مزاحمتی تنظیم کا کہنا ہے کہ تمام لاشوں تک پہنچنے میں وقت درکار ہے یرغمالیوں کی لاشیں نکالنے کے لیے آلات درکار ہیں، ملبہ ہٹانے والے آلات سفاک اسرائیلی پابندی کی وجہ سے دستیاب نہیں ہیں۔

گزشتہ روز حماس نے اپنے بیان میں کہا تھا غزہ امن معاہدے کے تحت جو وعدے کیے اس پرعملدرآمد کے لیے پرعزم ہیں ان قابض اسرائیلی مغویوں کی لاشیں حوالے کی ہیں جنھیں تلاش کر سکتے تھے جبکہ دیگر کی تلاش جاری ہے۔