غزہ(روز نامہ قدس ۔آن لائن خبر رساں ادارہ) اسلامی تحریک مزاحمت (حماس) کے سیاسی شعبے کے سینیر رکن ڈاکٹر محمود الزھار نے کہا ہے کہ مزاحمت فلسطینی قوم کے پاس ایک ہتھیار ہے۔
روز نامہ قدس کو موصول ہونے والی اطلاعات کے مطابق فلسطین میں ’’یوم الارض‘‘ کی مناسبت سے نکالے گئے ملین مارچ کے موقع پر انہوں نے کہا کہ فلسطینی قوم غزہ کی ناکہ بندی کے خاتمے کے مطالبے سے پیچھے نہیں ہٹیں گے۔ القدس کی آزادی اور وادی گولان کو شام کا حصہ بنانے تک جدو جہد جاری رکھی جائے گی۔ ان کا کہنا تھا کہ صیہونی دشمن فلسطینیوں کے خلاف طاقت کے استعمال میں اندھا ہوگیا ہے مگر فلسطینی عوام مزاحمت سے دست بردار نہیں ہوں گے۔
انہوں نے مزید کہا کہ فلسطین کو فروخت کرنے والوں کا کوئی مستقبل نہیں۔ فلسطین کی سودے بازی کرنے والے غلطی پر ہیں اور وہ جلد اپنے انجام کو پہنچ جائیں گے۔
خیال رہے کہ ہفتے کے روز 30مارچ کو فلسطین میں ’’یوم الارض‘‘ کے موقع پر ملین مارچ کا انعقاد کیا گیا جس میں لاکھوں فلسطینیوں نے شرکت کی تھی۔