غزہ (روز نامہ قدس ۔آن لائن خبر رساں ادارہ) اسلامی تحریک مزاحمت (حماس) نے خبردار کیا ہےکہ اسرائیلی ریاست کی طرف فلسطینی قوم کے خلاف اجتماعی سزاؤں کی پالیسی اسرائیل کو مہنگی پڑے گی اور اسرائیل کو اپنے جرائم کی سزا ضرور ملے گی۔
روز نامہ قدس کو موصول ہونے والی اطلاعات کے مطابق حماس کی طرف سے جاری کردہ ایک بیان میں کہا گیا ہے کہ فلسطینی قوم کے خلاف اسرائیلی ریاست کے جرائم پر دشمن کو سزا ضرور ملے گی۔ ان کا کہنا تھا کہ اسرائیل کی ریاستی دہشت گردی اور جبرو تشدد کی پالیسی سے فلسطینی قوم شکست خوردہ نہیں ہوں گے اور نہ ہی اس سے مزاحمت کمزور ہوگی۔ فلسطینی قوم آزادی کے لیے جدو جہد جاری رکھے گی اور ہماری مزاحمت جاری رہے گی۔
بیان میں مزید کہا گیا ہے کہ اسرائیل مسلسل حماقتوں کا مرتکب ہو رہا ہے۔ فلسطینی مزاحمت کاروں کے گھر مسمار کرنے سے فلسطینی مزاحمت کمزور نہیں ہوگی بلکہ یہ اور بھی طاقت پکڑے گی۔
بیان میں اسیر عاصم البرغوثی کے مکان کی مسماری کو اسرائیلی فوج کی بزدلانہ کارروائی قرار دیا۔
بیان میں کہا گیا ہے کہ پوری قوم کو کو البرغوثی خاندان پر فخر ہے۔ پورا البرغوثی خاندان مزاحمت کا پیکر ہے۔