رپورٹ کے مطابق حماس کے ترجمان سامی ابو زھری نے اپنے ایک بیان میں کہا ہے کہ نیتن یاھو فلسطینی تحریک آزادی کو دہشت گردی کی لعنت سے جوڑ کر دنیا کو گمراہ کرنے کی بھونڈی کوشش کررہے ہیں۔ دنیا جانتی ہے کہ فلسطین میں جو کچھ ہو رہا ہے وہ آزادی کی تحریک ہے اور دنیا اسرائیلی وزیراعظم کی باتوں میں آْکر اسے دہشت گردی قرار نہیں دے سکتی۔
حماس کے ترجمان نے کہا کہ نیتن یاھو فلسطینی تحریک آزادی کے حوالے سے عالمی رائے عامہ کو گمراہ کرنے کی کوشش میں کسی صورت میں کامیاب نہیں ہوسکتے ہیں۔
سامی ابوزھری کا کہنا تھا کہ اسرائیل خود دنیا بھر میں دہشت گردی کی علامت سمجھا جاتا ہے۔ اس لیے امن پسند دنیا صہیونی وزیراعظم کی باتوں میں نہیں آئے گی۔
خیال رہے کہ اسرائیلی وزیراعظم بنجمن نیتن یاھو نے حال ہی میں ایک ٹی وی انٹرویو میں فلسطینی تحریک مزاحمت اور تحریک آزادی کو عالمی دہشت گردی کا حصہ قرار دینے کی مذموم کوشش کی تھی جس پر فلسطینی حلقوں کی جانب سے شدید رد عمل سامنے آیا ہے۔