فلسطینی اتھارٹی کےزیرانتظام سیکیورٹی فورسز نے ہفتے کے روز اسلامی تحریک مزاحمت ’’حماس‘‘ کے طلباء ونگ اسلامک بلاک کے جامعہ بیرزیت میں مندوب جہاد سلیم کوحراست میں لے لیا۔ سلیم کو ایک ایسے وقت میں حراست میں لیا ہے جب حال ہی میں جامعہ بیرزیت میں طلباء یونین کے انتخابات میں اسلامک بلاک نے واضح کامیابی حاصل کی تھی۔
اسلامک بلاک کے ترجمان عبدالرحمان حمدان نے مرکزاطلاعات فلسطین کو بتایا کہ عباس ملیشیا کے سیکیورٹی اہلکاروں نے ہفتے کے روز الخلیل میں تلاشی کی کارروائیوں میں تنظیم کے مندوب جہاد سلیم اور دو دیگر ساتھیوں کے ہمراہ حراست میں لیا۔ جنہیں بعد ازاں ررام اللہ میں ایک سیکیورٹی مرکز میں منتقل کردیا گیا ہے۔
حمدان نے بتایا کہ انسانی حقوق کی تنظیموں کی جانب سے جہاد سلیم کی گرفتاری کے خلاف احتجاج کیا ہے اور ان کی فوری رہائی کا مطالبہ کیا ہے تاہم انہیں رہا نہیں کیا گیا۔ آج انہیں عدالت میں پیش کیےجانے کا امکان ہے۔
دوسری جانب فلسطین کی طلباء تنظیموں نے جہاد سلیم کی گرفتاری کی شدید مذمت کرتے ہوئے اسے فلسطینی اتھارٹی کی جمہوری دشمنی سے تعبیر کیا ہے۔ طلباء گروپوں اور اسلامک بلاک کا کہنا ہے کہ فلسطینی اتھارٹی بلاک کی انتخابات میں کامیابی پرچراغ پا ہے اور اوچھے ہتھکنڈوں کے ذریعے اسلامک بلاک کو دبانے کی سازشیں کررہی ہے۔
بشکریہ:مرکزاطلاعات فلسطین